ФОТО: Одржана показна вежба за постапување при пожар во Дом за стари лица во oпштина Ѓорче Петров

Показна вежба за постапување при пожар во Дом за стари лица во Општина Ѓорче Петров се одржа денеска, а по повод одбележувањето на Меѓународниот ден за намалување на ризиците од катастрофи под мотото „Отпорноста започнува дома“. Институциите преку вежбата ја покажаа подготвеноста на службите, меѓусебната координација и постапките за безбедна евакуација на повозрасните лица. -Во итни ситуации секоја секунда е важна. За нашите повозрасни сограѓани, особено за оние со ограничена подвижност и здравствени тешкотии, навремената помош и добро подготвените служби можат да бидат пресудни. Затоа, превенцијата и практичната подготовка мора да бидат постојана обврска, истакна градоначалникот на Општина Ѓорче Петров, Александар Стојкоски. Во показната вежба учествуваа: просторните сили за заштита и спасување на Општина Ѓорче Петров, скопската противпожарна бригада, ЦУК, ДЗС, Црвениот Крст, полициската станица во Ѓорче Петров. Стојкоски изрази посебна благодарност до УНДП и постојаниот претставник Армен Григорјан за партнерството и поддршката во градењето поподготвени и поотпорни заедници.