Возач одбил да застане на полициски знак во Тетово и удрил полицаец со автомобил

Полициски службеници од СВР Тетово го лишиле од слобода Р.А. (53) од селото Стримница, тетовско, откако не застанал на знак за запирање и со возилото удрил полициски службеник, соопшти Министерството за внатрешни работи. Според МВР, инцидентот се случил на 24 јули 2026 година во 16:50 часот на булеварот „Маршал Тито“ во Тетово. Осомничениот управувал патничко моторно возило „Мерцедес“ со германски национални ознаки. При полициска контрола, возачот не постапил по наредбата за запирање и продолжил со движењето, при што со возилото удрил полициски службеник. По инцидентот, 53-годишникот бил лишен од слобода и задржан во полициска станица. По целосното документирање на случајот, против него ќе биде поднесен соодветен поднесок, информираат од МВР.