Синкевичус: Германската бригада во Литванија е врвен приоритет на новата влада

Новиот литвански премиер, Миндаугас Синкевичус, во телефонски разговор со германскиот канцелар, Фридрих Мерц, изјави дека развојот на воената и цивилната инфраструктура за планираното распоредување на германската бригада во Литванија ќе биде еден од главните приоритети на неговата влада. „Можам да ве уверам дека и Владата и јас лично му придаваме највисок приоритет на тоа прашање“, му рекол Синкевичус на Мерц, соопшти Државната канцеларија во Вилнус. Тој додал дека ќе работи на натамошно зајакнување на односите меѓу Литванија и Германија, оценувајќи ги како „единствени во Европа“. Распоредувањето на германската бригада во Литванија беше најавено како одговор на зголемената закана од Русија и се смета за клучен дел од зајакнувањето на источниот крило на НАТО. Според планот, до 2027 година во Литванија треба трајно да бидат стационирани до пет илјади германски војници, чија главна база ќе биде во воениот комплекс што се гради во Руднинкај. Синкевичус и членовите на неговиот владин кабинет положија заклетва во вторникот. Четириесет и двегодишниот политичар е трет социјалдемократски премиер по парламентарните избори во 2024 година, а најави дека неговата прва официјална посета во странство ќе биде на Германија.