Кенија: Потврден осми случај на ебола

Кенија потврди нов случај на ебола, со што бројот заразени во земјата се зголеми на осум, соопшти генералниот директор за здравство, Патрик Амот. Станува збор за 49-годишен маж, кој не е здравствен работник, а кај кого биле потврдени висока температура, главоболка и мускулни болки. Од вкупно 38 тестирани лица, само неговиот тест бил позитивен, изјави Амот за локална телевизија. Според здравствените власти, заразениот бил придружник на пациент, задолжен за чистење садови и постелнина. Се претпоставува дека бил во контакт со првиот случај на ебола во Кенија - маж кој пристигнал од Демократска Република Конго во Најроби и починал во болница на 5 октомври. Симптомите кај новозаразениот се појавиле во саботата, по што бил изолиран, а вчера бил потврден позитивниот резултат од тестирањето, соопшти извор од Министерството за здравство. Кенија е во состојба на зголемена готовност поради ширењето на епидемијата на ебола што започна во Демократска Република Конго и се проширува во регионот. Властите во ДР Конго неодамна потврдија дека епидемијата се проширила и во осмата провинција, Северен Убанги, што дополнително ја зголеми загриженоста за ширење на вирусот во регионот. (МИА)