Италија издаде црвен метео аларм за сите 27 поголеми градови

Италијанската влада денеска издаде највисоко ниво на предупредување за топлински бран или црвен метео аларм за сите 27 поголеми градови во земјата што ги следи италијанскиот здравствен оддел, бидејќи во целата земја продолжуваат температурите над 35 степени Целзиусови. Црвеното ниво на предупредување го издава владата во Рим кога има екстремна топлина во комбинација со висока влажност. Ова значи дека постојат акутни здравствени ризици не само за постарите лица и другите ризични групи, туку и за здравите луѓе и оние кои се физички активни. Нивото на предупредување сега се применува од север кон југ, од Болцано во Јужен Тирол до Палермо на медитеранскиот остров Сицилија. Температури од над 35 степени денеска се очекуваат на многу места во земјата. За Фиренца и главниот град Рим метеоролозите предвидуваат максимални температури над 40 степени. Постојаната топлина и суша влијаат и на реките и езерата во Италија. На најдолгата река во Италија, реката По, властите мерат значително пониски нивоа на водата од вообичаеното за овој период од годината на сите станици. Езерото Маџоре во северна Италија, второто најголемо езеро во земјата по езерото Гарда, се приближува до историски најниски нивоа. Во меѓувреме, во северниот дел на Јадранското Море се измерени температури од над 30 степени…