Иранската армија соопшти за нова серија напади врз американски бази во регионот

Иран извршил нов бран напади со дронови врз американски воени бази во земјите од Персискиот Залив, соопштуваат ирански медиуми повикувајќи се на воени извори. Според иранските власти, цел на нападите биле воздухопловната база Иса на југот на Бахреин и базата Мувафак Салти во централно-источен Јордан. Иранската војска соопшти дека во Бахреин биле гаѓани резервоари за гориво, складишта за опрема, хангари и објекти за сместување војници. Во Јордан, според истите наводи, цели на нападите биле авионски хангари и објекти за сместување. По информациите за нападите, Министерството за внатрешни работи на Бахреин соопшти дека биле активирани аларми, а граѓаните повикани да се засолнат во најблиските безбедни места. Засега нема потрда од независни извори за иранските тврдења за извршените напади.