Здравствените работници во Конго протестираат против неисплатените плати за време на епидемијата на ебола

Десетици здравствени работници кои работат во епицентарот на епидемијата на ебола во Конго денеска штрајкуваа и организираа протести, барајќи исплата на платите, поради што неколку здравствени установи ја прекинаа работата, а помошта на болните е отежната. Американските медиуми пренесуваат дека здравствените работници протестираат пред седиштето на покраинската влада во Бунија, главниот град на покраината Итури, која сочинува речиси 90 проценти од случаите на ебола во земјата. Меѓу вработените кои престанаа да работат се медицински сестри кои обезбедуваат критична нега на пациенти со ебола. Тие тврдат дека од прогласувањето на епидемијата во средината на мај, не добиле плати и надоместоци за ангажирање во борбата против болеста. Протестите поради неисплатените плати на здравствените работници траат веќе неколку недели, а вработените наведуваат дека поради доцнење на плаќањата, се принудени да ги напуштат своите работни места во здравствените центри кои се на првата линија на борбата против епидемијата. Провинцијата Итури моментално е епицентар на епидемијата на ебола во Демократска Република Конго, за која здравствените власти велат дека се шири брзо.