Том Круз одржа говор, Иниеста го донесе трофејот: Гламурозна увертира пред финалето на Мундијалот

Пред почетокот на големото финале на Светското првенство 2026 меѓу Аргентина и Шпанија, на стадионот во Њујорк и Њу Џерси беше одржана завршната церемонија на Мундијалот. Програмата започна со група американски перкусионисти и акробати, кои настапија заедно со стримерот IShowSpeed. Тој ја изведе песната „World Cup (Champions)“, една од нумерите од официјалниот музички албум на турнирот. Во продолжение настапи Пост Малоун со песната „Chrome Heartbreaker“, а потоа на сцената му се придружи Свеј Ли за заедничка изведба на хитот „Sunflower“. Нивниот настап беше проследен со силна пиротехника, која дополнително ја подигна атмосферата на исполнетиот стадион. Холивудската ѕвезда Том Круз потоа излезе на теренот и одржа говор пред почетокот на натпреварот. Трофејот на Светското првенство беше донесен на теренот во кутија на „Луј Витон“, по што пред навивачите го претстави легендарниот шпански фудбалер Андрес Иниеста. Џенифер Хадсон ја исполни химната на Соединетите Американски Држави, а музичкиот дел од церемонијата заврши со изведбата на песната „Desire“, официјалната химна на ФИФА. Песната ја изведоа Роби Вилијамс, Никол Шерцингер и Лаура Паузини. Со оваа церемонија беше означен крајот на Светското првенство во САД, Мексико и Канада и почетокот на борбата за светската титула меѓу Аргентина и Шпанија.