Тенисер доби жестока казна поради местење натпревари

Српскиот тенисер Стефан Милиќевиќ (29) е суспендиран на дури 24 години поради сериозни прекршувања на антикорупциските правила во тенисот, пренесува „Телеграф“. Меѓународната агенција за интегритет во тенисот (ИТИА) го обвини за местење натпревари, обиди за манипулирање со резултати, но и за регрутирање други играчи во корупциска мрежа. Според изречената казна, Милиќевиќ ќе може да му се врати на тенисот дури на 8 октомври 2050 година, под услов во меѓувреме да не се појават други пречки за неговото враќање. Практично, неговата кариера е завршена. Покрај тоа, ќе мора да плати и парична казна од 70.000 долари. Според наводите на ИТИА, српскиот тенисер во периодот од 2022 до 2024 година учествувал во местење на шест натпревари, од кои на пет и самиот настапувал. Исто така, обвинет е дека се обидел да намести уште шест натпревари.