Шпанија: Над 13.000 хектари земјиште уништени во шумските пожари

Во шумските пожари што избувнаа претходно оваа недела на околу 100 километри северно од Мадрид беа зафатени повеќе од 13.000 хектари, соопштија денеска локалните власти. Пожар во регионот Гвадалахара уништи 13.000 хектари земјиште и загрози повеќе од 700 луѓе, соопшти противпожарната служба надлежна за централниот регион на Шпанија. Околу 350 пожарникари и припадници на единицата за вонредни ситуации на шпанската војска, поддржани од 25 авиони, се испратени во загрозеното подрачје, пишува „Монд“. Пожарот избувна во планинска шумска област што е живеалиште на загрозени видови орли и волци. Се очекува топлотниот бран да трае до четврток, кога температурата би можела да надмине 45 степени во изолирани области. (МИА)