Нов колапс на електроенергетската мрежа остави десет милиони Кубанци без струја

Кубанската национална електроенергетска мрежа доживеа колапс доцна синоќа, соопшти државната електроенергетска компанија наведувајќи дека околу 10 милиони жители на островската земја се во мрак. Компанијата „Union Electrica de Cuba“ не изнесе дополнителни детали во своите објави на социјалните мрежи. До најновиот прекин во снабдувањето дојде по три прекини на струја на ниво на целата земја во текот на јули во момент кога е во сила американската блокада за увоз на нафта и блокадата на застарената енергетска инфраструктура на Куба. Локалните медиуми јавуваат дека дури и во богатите населби на кубанската престолнина се чувствува непријатен мирис на расипана храна бидејќи ладилниците во малопродажните објекти не можат да издржат подолги периоди без струја, генераторите што одржуваат струја често откажуваат поради големото оптоварување, а гориво за нив во моментов е прилично тешко да се набави во Куба. Огромни купишта смет повторно се натрупани на градските улици бидејќи нема доволно гориво за камионите за ѓубре. Покрај прекинот на струја, луѓето имаат проблеми со водата и комуникацијата и речиси е невозможно да се добие одговор на пораките или дури само да се контактира со некого по телефон.