На Табановце запрено „волво“ кое било барано од Интерпол

Полициски службеници на Граничниот премин Табановце привеле 42-годишен државјанин на Романија, откако при гранична контрола било утврдено дека возилото со кое влегол во државата било предмет на меѓународна потрага. Инцидентот се случил на 25 јули 2026 година во 02:39 часот, на влез во државата. При пасошка контрола и гранични проверки било констатирано дека патничкото возило „волво“ со шведски национални ознаки, управувано од Л.Ф. (42) од Романија, било предмет на меѓународна потрага распишана од Интерпол Стокхолм, соопшти МВР. Лицето било лишено од слобода и предадено на полициски службеници од СВР Куманово за понатамошна постапка.