Манасиевски: СДС, Левица и ДУИ секоја можност за договор ја претвораат во нов политички конфликт

Портпаролот на ВМРО-ДПМНЕ, Валентин Манасиевски, на денешната прес-конференција обвини дека СДС, Левица и ДУИ секоја можност за политички договор ја претвораат во нов политички конфликт, осврнувајќи се на процесот за донесување на новиот Изборен законик. Според Манасиевски, наместо да придонесат за усвојување на законското решение, кое, како што рече, било резултат на повеќемесечни разговори и усогласувања, опозициските партии повторно избрале да создадат политичка криза. Тој изјави дека ВМРО-ДПМНЕ ги прифатило сите барања на СДС, Левица и ДУИ, оценувајќи дека тие не биле поврзани со суштината на законот, но дека и покрај тоа опозициските партии не го поддржале законското решение. Манасиевски оцени дека за опозицијата е поважно да создава политички конфликти отколку да придонесе за решенија што, според него, се во интерес на државата. Дополнително, тој обвини дека СДС, Левица и ДУИ се обидуваат да создадат алиби за евентуален изборен пораз и да го намалат успехот на државата во спроведувањето на Реформската агенда. Од ВМРО-ДПМНЕ порачаа дека ќе продолжат да работат, како што наведоа, во интерес на граѓаните и државата, без оглед на политичките несогласувања со опозицијата. Портпаролот на ВМРО-ДПМНЕ тврди дека опозициските партии не го поддржале новиот Изборен законик и покрај, како што рече, прифатените барања https://www.youtube.com/watch?v=AWkkMVqdSRE&authuser=1