Лукровски: Шахот ги поврза генерациите во Карпош

По повод Меѓународниот ден на шахот, денес на платото „Млечен“ се одржа „Шаховско утро“ – настан што обедини љубители на шахот од различни генерации. Учесниците имаа можност да одиграат пријателски партии, да разменат искуства и да уживаат во пријатна атмосфера. Интересот и играта на присутните уште еднаш потврдија дека шахот е игра која развива стратегија, концентрација и меѓусебна почит. На настанот присуствуваше и градоначалникот на Општина Карпош, Сотир Лукровски, кој им се придружи на шахистите и ја истакна важноста од поддршката на спортските и рекреативните активности што ги поврзуваат граѓаните. „Во изминатиот период поставивме пет шаховски табли низ Карпош, со цел да го поттикнеме развојот на шахот како игра што придонесува за развој на концентрацијата, логичкото размислување и стратешките вештини, особено кај младите. Ќе продолжиме да вложуваме во содржини што ги мотивираат граѓаните да се дружат, рекреираат и активно да го поминуваат своето слободно време“, истакна Лукровски. Општина Карпош продолжува да создава можности за промоција на спортот, дружењето и здравите животни навики, со содржини достапни за сите генерации.