Клековски: Се работи на надминување на дефектот на циклотронот, откако ќе почне да работи приоритет ќе имаат пациенти од Онкологија и Хематологија

Нема дефект во ПЕТ/КТ скенерот, туку во циклотронот, каде се произведува радиофармацевтското средство (18F-FDG) потребно за прегледот. Дефектот е резултат на лошо сервисирање и веќе се работи на негово надминување. Ова го објави министерот за здравство Сашо Клековски на неговиот фејсбук профил. - Со почеток на работењето на циклотронот приоритет имаат пациентите според насоките на клиниките за онкологија и хематологија! Предизвиците со сервисот не можат да ја замаглат реалната состојба. Во 2025 година се направени 2.703 прегледи наспроти 2.183 во 2022 година — тоа е 520 прегледи повеќе, односно раст од ~23,8 отсто, и покрај тоа што има речиси двојно повеќе сервисни денови - наведува Клековски. Посочува дека и покрај големиот број денови на прекин во работењето, бројот на прегледи на пациенти се зголемувал, што според него, е знак дека тимот успешно го надоместува изгубеното време и продолжува да опфаќа повеќе пациенти. Тој упатува благодарност до тимот на Универзитетскиот институт за позитронско емисиона томографија. - Продолжуваме да обезбедуваме уште повеќе можности за пациентите! - објави Клековски. (МИА) [facebook_post url="https://www.facebook.com/SasoKlekovski/posts/pfbid0BcEyHFdkK3tQ9GqUaVwxwffaKxBq25tEkxg4BD2rXcQuVvmJd2NhRwBMsb3o37nml"]