Кенеди ќе ги оправа Американците: Ќе ги учи да готват, за да не се дебелеат

Министерот за здравство Роберт Кенеди Јуниор има нов рецепт како Американците да бидат повторно здрави. Владата ќе им понуди иницијативи за да ги научи како самите да готват, ќе организира курсеви и едукативни кујни и ќе им нуди рецепти за брзо подготвување оброци со здрави состојки наместо да се дебелат со ултрапреработена брза храна. Според најавите на Кенеди, студентите по медицина ќе посетуваат часови по готвење, а потоа ќе излегуваат на терен во заедниците и во мобилни кујни ќе ги подучуваат луѓето како да готват. Околу 5.000 униформирани службеници од Корпусот на офицери на Службата за јавно здравје на САД веќе посетуваат часови за здрава исхрана и развиваат едукативни кујни. На нова федерална платформа ќе се објавуваат рецепти за здрава исхрана со буџет од 10 долари дневно, како и видеа со препораки за купување намирници, дури и совети како да се користи приборот за јадење и за готвење. Иницијативата почна уште во јануари кога Кенеди и министерката за земјоделство Брук Ролинс ги објавија Упатствата за исхрана за Американците за 2025-2030 година. Обемниот извештај на 453 страници од советодавниот комитет беше отфрлен како „неразбирлив“ и беше заменет со документ од 10 страници и нова превртена пирамида на храна.