ФОТО: Барби како Мерилин Монро по повод 100-годишнината од раѓањето на холивудската икона

Американската компанија „Мател“ претстави нова кукла Барби инспирирана од Мерилин Монро, по повод 100-годишнината од раѓањето на една од најголемите холивудски ѕвезди. Новата кукла од колекцијата Барби Сигнати е инспирирана од иконскиот изглед на Мерилин Монро од филмот „Џентлмените претпочитаат русокоси“ од 1953 година, односно сцената во која Монро ја изведува познатата песна „Дијамантите се најдобриот пријател на девојката“. Барби носи розов сатенски фустан со голема машна, долги ракавици и впечатлив накит инспириран од дијаманти. Изгледот на куклата е дизајниран да личи на еден од најпрепознатливите костими на Мерилин Монро. View this post on Instagram A post shared by Barbie (@barbie) Мерилин Монро е родена на 1 јуни 1926 година во Лос Анџелес, а нејзината кариера го одбележа златното доба на Холивуд. И повеќе од шест децении по нејзината смрт, нејзиниот лик останува еден од најпрепознатливите симболи на американската популарна култура. Мател претходно претстави кукли Барби инспирирани од Мерилин Монро. Првиот ваков модел се појави во 1997 година, а новото издание е дел од серијата со која компанијата им оддава почит на познати личности и културни икони.