Еден загинат во пожар во фабрика за oцет на Пелопонез

Во пожар што избувна во фабрика за производство и пакување оцет во близина на градот Коринт на грчкиот полуостров Пелопонез, животот го загуби едно лице, а најверојатно на пожарот му претходела силна експлозија, јави дописничката на МИА од Атина. Според информациите од противпожарната служба на Грција околу 13.30 часот биле известени за пожарот по што веднаш интервенирале 35 пожарникари, еден пешадиски тим, 11 возила и волонтери, како и цистерни од општината. За време на гаснењето, пожарникарите извлекле безживотно тело на засега неидентификувано лице. Локалните медиуми од Коринт пишуваат дека се слушнала силна експлозија, по што следел и пожарот, а голем дел од фабриката е изгорен.