ДЗС набави две нови теренски возила за интервенции при поплави и пожари

Дирекцијата за заштита и спасување (ДЗС) има на располагање две нови теренски возила со 4x4 погон. Ќе се користат за интервенции при поплави, шумски пожари и други природни и техничко-технолошки катастрофи, како и за активности во рамки на прекуграничната соработка со партнерските институции - информира денеска прес-службата на ДЗС. Испораката на новите возила е извршена во присуство на директорот на ДЗС Стојанче Ангелов. Возилата ДЗС ги набави преку иницијативата „Волонтер 2“ (VOLUnteer II), со поддршка и финансиска помош од Европската Унија и партнерските институции вклучени во проектните активности oд Грција. Според ДЗС, со оваа набавка се зајакнуваат оперативните капацитети и мобилноста на тимовите на Дирекцијата, со цел побрз и поефикасен одговор при вонредни состојби. Проектот „Напредна рамка за намалување и управување со ризиците од поплави и други повеќекратни опасности“, (Interreg VI-A IPA Greece - North Macedonia 2021–2027), обезбеди поддршка од Европската Унија, за која, се вели во соопштението, ДЗС изразува благодарност како и до сите партнерски организации од Грција за нивниот придонес во зајакнувањето на капацитетите за цивилна заштита (Network Operational Support – Education of the Volunteers Associations and University of Macedonia).