Четири лица загинаа, меѓу кои и едно дете, во руски напад врз Суми

Најмалку четири лица го загубија животот, меѓу кои и едно дете, во напад на руските сили врз Суми, соопшти началникот на Сумската регионална воена управа, Олег Григоров. „Руската војска изврши напад со наведувани авиобомби врз цивилната инфраструктура на Суми, убивајќи четири лица, вклучувајќи и едно дете“, наведе Григоров во објава на социјалните мрежи. Според него, цел на нападот било место каде што се наоѓале цивили и каде што се движел јавен превоз. „Епицентарот на еден од ударите беше патот и постојка за јавен превоз. Непријателот очигледно бил свесен дека ќе бидат погодени и цивили“, додаде тој. Григоров исто така изјави дека три лица се во тешка состојба. Вршителот на должноста градоначалник на Суми, Артем Кобзар, соопшти дека животот го загубило едно девојче и дека спасувачката акција по нападот е во тек.