Андоновски: Нема да дозволиме матни тендери по цена на човечки животи, како во времето на СДС и Филипче

СДСМ и Венко Филипче ќе бидат против сѐ во оваа држава, само за Македонија да не успее. За да не успееме како држава тие ќе бидат и против центри за податоци, и против странски инвестиции, и против влез на високи технологии. Подготвени се да бидат и против нови вработувања - само Македонија да пропаѓа како што пропаѓаше седум години. Се покажа во минатото на неговиот патрон чија одлика е да работи сѐ спротивно на македонските граѓани и национални интереси, се вели во соопштението на ВМРО-ДПМНЕ од фејсбук статусот на министерот за дигитална трансформација Стефан Андоновски. Нагласува дека ќе продолжат да работат за иднината и напредокот. -За нивно жалење, ќе има и нови инвестиции во високи технологии и ќе се развива Македонија во дигиталната сфера. Тоа никогаш нема да значи компромис со животната средина, воздухот и водата. Ние не сме луѓе кои ќе дозволат, заради матни тендери, живи да изгорат пациенти во болници. Или да немаат една контрола за чистота на вода со години, а да вршат функција министер за здравство, вели Андоновски.